Läbesfröid (Edi Gasser)

Wie gärn gseh ni dr Früehlig cho, d’Natur erwachet und es stimmt mi froh, wenn Chraft u Saft i Pflanze schiesst u d’Sunne erschti Blueme gniesst. De läbt me uf, es git nöii Chraft, i wünschti jedem dass är’s schafft. De läbt me uf, es git nöii Chraft, i wünschti jedem dass är’s schafft.

Wenn s’Gras u Blueme ryfe tüe, de wüsse d’Buure was si schaffe müeh. Vo Chöuch zu Chöuch es Bienli flügt, dr Gruch vo Heu i d’Nase stygt. Wär das nid kennt, i bedure fasch s’wär s’Beschte gäge Hetz z Hascht.Wär das nid kennt, i bedure fasch s’wär s’Beschte gäge Hetz z Hascht.

Löh d’Herbschtböim aber d’Bletter go, de het d’Natur scho ihri Arbeit to. Dr Winter chunnt, mach d’Ski parat, s’isch Zyt wo s’Härz haut schnöuer schlot. Wie schön wenn’s stüübt so im früsche Schnee, wär’s do nid packt, dä wett ig gseh. Wie schön wenn’s stüübt so im früsche Schnee, wär’s do nid packt, dä wett ig gseh.



Ledig
(Hans Walter Schneller)

Wie schön isch’s am Schärme im eigete Huus u wenn’s mir verleidet so zieh ni haut us. I Ochse, i Löie, es Schnäppli go näh und niemer zöhuts noche gits öppe eis meh u nimer zöhuts noche gits öppe eis meh.

Villicht hets e Musig, es längt zume Jass. Am Tisch i dr Rundi weiss jede e Gspass. U schlohts a dr Chile baud eis oder zwöi, keis Frätzli het gmüedet chumm gli wieder hei, keis Frätzli het gmüedet chumm gli wieder hei.

Bi eischter mi eigete Meischter u Chüng u aus louft am Schnüerli so luschtig u ring. U spienzle die Meitli u mache mir Gluscht, es Schmützli im Dunkle si gäs ume susch, es Schmützli im Dunkle si gäs ume susch.



Lysi Zeiche
(Peter Künzi)

Heimlech goh ni spät am Obe stüu am wyte Achern oh. S’isch mir grad, i sötti bätte, wenn i vor de Ähri stoh.

S’isch es Meer vo luuter Haume. D’Ähri hange gross u schwär. Eine het dr Acher gsägnet, Säge chunnt vo obe här.

Rote Moon u blaui Wicke döse uf em herte Grund. Us dr Töifi singt e Grille ihres Lied i d’Obestung.

Wie nig für mi häre stuune, nachtet’s übrem Acher y. Gäb’s dr Herrgott, dass i einisch es ryfs Ähri dörfti si. 

Letzte Änderung: 11. April, 2018