Sängertreu (Max Lienert)

Es tönt es Lied so häu und klar, e Jutz im Fründeschreis. Oh, Härz u Seel, wie wunderbar, bim Liede si si eis. So het das schöne Ideau üs zämegfüehrt vor Johre. Dir Heimatsang güut üsi Wahu dir hei mir Treui gschwore.

Wie schöni Täg, wo d’Sunne lacht, so git’s ou trüebi Stung. Öb gar s’Gebälk im Schiffli kracht, was tuet’s das hautet gsung. Wenn’s aber güut, de stöh mir i, die Junge näb de Aute, und si mir ou a Zahl nur chli, i Treu wird zäme ghaute.

Drum, Kamerade hautet Wacht, i Fründschaft gäht öich d’Hand. Wo no i Freiheit gsunge wird, do isch es glücklechs Land. Und hout dr Schnitter eine ab, däm chönne mir nid wehre. I Treui aber über Grab söu är s’letscht Liedli ghöre.



Schnittertanz
(Robert Fellmann)

Chüechligschmack i jedem Huus, d’Schnitter feschte d’Ärn isch us. Aut u jung, gross u chli, lö hütt füfi grad lo si. Meitschi, Buebe, Frou u Maa, fasch s’hingerscht Bei wo no cha go, zieht vou Fröid zum Pintefranz, läbe uf im Schnittertanz.

D’Musig spüut hei dideldum, aues fahrt jetz z’ringsetum, Buur u Chnächt, rych und arm, schwitze drab dass Gott erbarm. Eins, zwei, drei, vier ganz exakt, so flüge d’Röck im Polkatakt. Zündet grad wie höhli Blitz Meitschibei u Hosespitz.

Wie’s so geit bi Spüu und Wy, stöut sich nadigs d’Liebi i. Stüpft e Bueb, stüpft es Chind, geit mit beidne abem Wind. Seelig glänze Ougepaar und grad wie do vor hundert Johr, chöme d’Schoss zum Hochsigchranz, schuld isch nur dr Schnittertanz.



Schwandhütte-Jutz
(Franz Stadelmann)


Schwingerlüt vom Schwyzerland (O. Fr. und H. Schmalz)

Hüt geits luschtig hei juhei. Schwinger sit Gottwüuche. Sigs dr Turner früsch u froh, sigs dr Senn im Zwüuche. Chräftig recke mir öich d’Hand, Schwingerlüt vom Schwyzerland.

Flingg i d’Hose, gryffet a, dass es fei tuet chrache. Gstoche, zoge, churz u läng, s’Härz muess eim do lache. S’isch e brave, chäche Stand, Schwingerlüt vom Schwyzerland.

Lue, dr Ätti isch ou do, z’vorderscht i dr Reihe mit em Bethli, we de gwinnsch, git’s gwüss e Meje. De es Tänzli mitenang, Schwingerlüt vom Schwyzerland.

Isch dr Hoselupf verbi, tuet mo no eis feschte. Trinkt me no e Glesu Wy, grad vom auerbeschte. Und i Fründschaft Hand i Hand, singe mir uf s’Schwyzerland.



Schwizervolk
(Max Lienert)

Schwizervouch, di Platz uf Ärde isch vom Schönschte was si treit. Ni darf übermüetig wärde, wäm das Leh i d’Hand isch gleit. Vouch, dass vieli Sproche spricht, Land wo Vöuker sich vereint, zeig dr Umwäut stüu u schlicht, wie’s dr Schöpfer wohu het gmeint.

Schwyzervouch, herb isch dis Wäse, sänkrächt doch u gsunger Art. Wär im Schwyzerhärz cha läse, findet Chraft u Güeti paart. Heimat für bedrängti Seele, Häufer du i grosser Not, loh dr Bundesbrief verzöue, wo vor Gwaut scho d’Freiheit steit.

Schwyzervouch, uf dine Bärge, i dr Stadt, i Dorf u Land. Chlinod, dass dr Herr uf Ärde dir het gleit i dini Hand. Zeig di würdig däm Vertroue, müud u glöibig, starch u treu. Was die Ahne dir hei boue, schaff du immer wieder neu.



Schwyzerbode
(Ernst Sommer)

Schwyzerbode, Schwyzerland heiligs Fläckli Ärde, i dr grosse Schöpferhand lyt dis Si u Wärde. Uf dim gsägnet Achergrund, s’guudig Ähri z’ryfe chunnt. Uf dim gsägnet Achergrund, s’guudig Ähri z’ryfe chunnt.

Schwyzerbode, Schwyzerland us dr Not gebore. Heb im strübschte Wätter stand, gang üs nid verlore. Sigs am Gotthard, sigs am Rhy ewig söusch du bhüetet si. Sigs am Gotthard, sigs am Rhy ewig söusch du bhüetet si.

Schwyzerbode, Schwyzerland frei i aune Fuege, loh mi höch vom Föuserand i di Garte luege. Schwyzerblueme rot u wyss, Schwyzerlüt im Paradies. Schwyzerblueme rot u wyss, Schwyzerlüt im Paradies.



S’Dorf erwachet
(Paul Müller-Egger)

Wenn d’Sunne het dr Chehrum gmacht u heizue chunnt vom Wandre, verlöscht ou langsam mit dr Nacht eis Stärnli nach em andre. Christauklar glänzt dr Morgetou im Wiederschyn vom Ätherblau. Christauklar glänzt dr Morgetou im Wiederschyn vom Ätherblau.

Dr Bärgwaud steit no feischter do im Dämmer no verborge. Doch drüber y u hingedra strahut füürig rot dr Morge. Im Dörfli styge wie zum Gruess, scho Röichli zu de Chemi us. Im Dörfli styge wie zum Gruess, scho Röichli zu de Chemi us.

Häu tönt e Dänguhammerschlag dür’s Dorf i aui Gade u bau geit uf em junge Tag dr letschti Fänschterlade. I Huus u Schüür i Fäud u Ried singt s’Tagwärch jetz sis Morgelied. I Huus u Schüür i Fäud u Ried singt s’Tagwärch jetz sis Morgelied.



Senne-Gruess (
Jean Clémençon)

Juhe, joho! Vo höcher Wand tönt’s früsch u froh dür’s Schwyzerland. Frogsch du dernoh, was söu bedüte, es isch e Gruess für aui Zyte. Ghörsch du e Jutz mit heitrem Klang, so fröisch di dra mängs Stündli lang. Ghörsch du e Jutz mit heitrem Klang, so fröisch di dra mängs Stündli lang.

Juhe, joho! S’git früeh, s’git spät e Senne gruess dür s’Ländli geit. Es friedlechs Vouk das froh ma singe, chasch du uf üsne Bärge finge. E häue Jutz gäng fröhlech z’Muet, das isch üs Bärglerlüt im Bluet. E häue Jutz gäng fröhlech z’Muet, das isch üs Bärglerlüt im Bluet.

Juhe, joho. Land uf, Land ab isch das dr Gruess vom Sennechnab. Säg, isch das nid es fröhlechs Grüesse vo Härze chunnt’s es isch keis Müesse. Dr Sennegruess dür d’Bärge us, treit Glück u Fröid is Schwyzerhuus. Dr Sennegruess dür d’Bärge us, treit Glück u Fröid is Schwyzerhuus.



Senn’s Abschied
(Hans Walter Schneller)

Lue, wie’s näblet dert um d’Hörner u dr Wind wähit scho ganz chaut. Üsi Zyt isch um hie obe, hei i s’Tau zieh mir dänk baud. Enzian u Auperösli liebri Blüemli chasch nid gseh, schlummre baud so warm u sicher ungrem weiche, töife Schnee.

D’Wättertanne näbem Hüttli süfzt u wiegt gar trurig s’Houpt. U däm Ahorn aut u schiter, het dr Ryf scho d’Blätter groubt. Darum Senne, s’Auphorn füre, blos mit jugendfrüscher Gwaut, dass dr Wüudbach drob verstuunet und’s dür Kluft u Föuse haut.

Bhüet öich Gott ihr grüene Triffte und ihr Föuse steil u kahl. Bhüet öich Gott mir müesse scheide, bhüet öich Gott mir zieh is Tau. Doch, wenn d’Bächli wieder ruusche aues blühejt im luschtge Mai, singe mir die schönschte Jodler wieder vo dr Aup juhei!



S’Heimweh
 (Jakob Kessler)

Bi e Bueb no jung a Johre nimme Abschid vo deheim. Vo mim Ätti, vo mim Müetti und vom Huus am Chilerain. S’Hüetli schwänk i oben Hüüsli, läbet wohu vüu tuusig mou. S’Heiweh nimmt mi wüu i furt muess vo mim liebe Wiesetau. S’Heiweh nimmt mi wüu i furt muess vo mim liebe Wiesetau.

S’isch e Schmärz ihr liebe Fründe, wenn eim s’Heiweh übernimmt. Immer dänk i a die Stunge öb’s äch no deheime si. S’chunnt es Briefli vo mim Ätti, drinne steit was s’Heiweh isch, arme Bueb! Dis Müetti chränklet wüu du nid deheime bisch, arme Bueb. Dis Müetti chränklet wüu du nid deheime bisch, arme Bueb.

Bi no einzig Ching deheime s’Gwüsse plogt mi sit dr Stung, und mis Müetti dänkt im stüue ob dr Bueb ächt ume chunnt. S’tönt e Jutz dört obem Hüüsli, Wiesetau het Sunneschyn, Müetti lue, de Bueb chunnt heime s’Heiweh, aues isch verby. Müetti lue, de Bueb chunnt heime s’Heiweh, aues isch verby.



Sing dis Lied
(Bruno Häner)

Mini Liedli hani gsunge a de stüue Wägli no, säuber ha se nid erfunge, ewig loufe si mir no.  Sing dis Lied vo säuber Zyt, das macht d’Härze froh u wyt. Sing dis Lied vo säuber Zyt, das macht d’Härze froh u wyt.

Mitts im gröschte Trubu inne bini ufsmou bliebe stoh, tuesch di zrügg a d’Heimat bsinne, mängs isch sithär angers cho. Sing dis Lied vo säuber Zyt, das macht d’Härze froh u wyt. Sing dis Lied vo säuber Zyt, das macht d’Härze froh u wyt.

Hei ou d’Hoor scho graui Fäde chunnt mir aus no einisch vor. Möcht no einisch nöi erläbe wie’s het tönt vor vüune Johr. Sing dis Lied vo säuber Zyt, das macht d’Härze froh u wyt. Sing dis Lied vo säuber Zyt, das macht d’Härze froh u wyt



So geits
(Paul Müller-Egger)

Nochbers Bänz u Meiers Kari si scho lang wie Hung u Chatz. Jede wär bi s’Ammes Marie grüsli gärn eleini Schatz, grüsli gärn eleini Schatz.

REFRAIN

Bis doch nid so truurig, bis doch nid so bling, s’het doch gwüss e andri Muetter öppe ou es hübesches Ching, gäu, bis doch nid so truurig, bis doch nid so bling s’het e andri Muetter ou es hübsches Ching. 

Doch em Marie gfraut dr Sämi und em Sämi d’Annegret. D’Annegret hät gärn dr Mäni und dr Mäni d’Lisebeth, und dr Mäni d’Liesbeth. 

REFRAIN

So spüut d’Liebi mit de Lüte Chatz u Muss u blingi Chueh, und am Änd vom Liedli lüte d’Hochzytsglogge doch derzue, d’Hochzytsglogge doch derzue.

REFRAIN



So wei mir sy
(Paul Meier)

Mir singe öich es fröhlechs Lied vom Chriesibluescht im Maie, mir singe wüu’s jetz wieder Blüejt, es Lied zum s’Härz erfreue. Chäch und stouz wie Föhrehouz, sprützig wie junge Wy, so wei mir Jodler si.

Mir singe öich es Summerlied vom Glanz uf Fäud u Matte, wenn d’Sunne über s’Dörfli zieht u spüut mit Liecht u Schatte. Chäch und stouz wie Föhrehouz, sprützig wie junge Wy, so wei mir Jodler si.

S’isch aus ei Farbeharmonie, dr Herbscht isch rych im Schänke. Mir wei mit jeder Melodie a üsi Heimat dänke. Chäch und stouz wie Föhrehouz, sprützig wie junge Wy, so wei mir Jodler si.



Soldanelle
(Adolf Stähli)

Vo Auperos u Männertreu weis gar mängs Lied z’verzöue. Doch kies ertönt so neu, wie das vor Soldanelle, lue eis da Blüemli a. Me kennt’s uf grüener Aupeweid, wüu’s gar es luschtigs Röckli treit. Me kennt’s uf grüener Aupeweid, wüu’s gar es luschtigs Sunntigröckli treit.

No haubewäg isch Winter gsi, wo ni scho z’Bärg bi gang. Wenn i s’erscht aper Fläckli gseh, packt mi es Bärgverlange, muess i i d’Höchi goh. Ha z’nächscht am Bach bim letschte Schnee die erschte Soldanelle gseh. Ha z’nächscht am Bach bim letschte Schnee die erschte Soldanelle gseh.

I weiss, du bisch kei Orchidee, wo lüüchtet us dr Wyti. U glych ha ni nach Froscht u Schnee, nach dir chli Längizyti, es eigets Plange gha. Oh Soldanelle zart u chly du lütisch mir dr Früehlig i. Oh Soldanelle zart u chly du lütisch mir dr Früehlig i.



Sommerszyt
 (Robert Fellman)

Geisch im Summer über d’Fäuder, über Matte und dür Wäuder. Git’s äs Stuune ohni Ändi. D’Frucht steit guudig schön am Haum. Näb de Wäge de Häge, gseht me schwarbe und Garbe. Oh du Summerzyt ou du machsch d’Härze wyt. Oh du Summerzyt wie bisch du schön. Oh du Summerzyt ou du machsch d’Härze wyt. Oh du Summerzyt wie bisch du schön.

Geisch im Summer über d’Weide, tuet dr s’wandre nid verleide. Gsehsch das rächte Senneläbe, lue nur guet u fröi di dra. Tuusig Rinder nid minger gsehsch bim Donner im Sommer. Darum Summerzyt ou du machsch d’Härze wyt. Oh du Summerzyt wie bisch du schön. Darum Summerzyt ou du machsch d’Härze wyt. Oh du Summerzyt wie bisch du schön.

Bisch im Summer i de Flüehne, uf me Band im saftig Grüene. Unger dir ä blaue Gletscher, fautisch d’Häng vo au däm gseh. I de Chräche de Bäche isch äs Glüeje, äs Blüeje. Oh du Summerzyt ou du machsch d’Härze wyt. Oh du Summerzyt wie bisch du schön. Oh du Summerzyt ou du machsch d’Härze wyt. Oh du Summerzyt wie bisch du schön.



Steimanndli-Juiz
(André von Moos)

Z’oberscht ufem Bärgspitz Stei uf Stei bi Rägewätter u bi Sunne, do steit es gäbigs Manndli ohni Bei, isch zfriede ohni Guet u Gäud. Z’oberscht ufem Bärgspitz, Stei uf Stei gseht äs uf aui Lüt hie unge, cha läbe ohni chöschtlechs Huus u Hei es ghört im doch die ganzi Wäut.

Z’oberscht ufem Bärgspitz Stei uf Stei bi Rägewätter u bi Sunne, do steit es gäbigs Manndli ohni Bei, isch zfriede ohni Guet u Gäud. Z’oberscht ufem Bärgspitz, Stei uf Stei gseht äs uf aui Lüt hie unge, cha läbe ohni chöschtlechs Hei es ghört im doch die ganzi Wäut.


Summer-Juitz
(Emil Wallimann)




Summermorge
(O. Fr. und H. Schmalz)

We aus am Morge stüu no isch, ou d’Vögu im Haag, mähit scho dr Buur dür d’Matte us u grüesst u grüesst e junge Tag. Är mäiht u mäiht gradus u dräiht, Schritt für Schritt, Schnitt um Schnitt. Är mäiht u mäiht gradus u drähit, Schnitt um Schnitt im Schritt.

Är chehrt si Sägesse u wetzt, druf luegt är umenang, gseht Huus u Hei u dänkt derby wie schön, wie schön isch doch mis Land. Är mäiht u mäiht im Schwung u dräiht, Schritt für Schritt, Schnitt um Schnitt. Är mäiht u mäiht, im Schwung u dräiht, Schnitt um Schnitt im Schritt.

Bim Brunne gseht är s’Bethli stoh, es wäscht die liebe Ching, u geit nächhär e anger noh, u macht e gueti Röschti gschwing. Ha Hunger tou, Sägesse hou. Schritt für Schritt, Schnitt um Schnitt. Ha Hunger tou, Sägesse hou, Schnitt um Schnitt im Schritt.

Är isch e Chönig i sim Rych, so glücklech u so froh. Gott sägnet ihm si Arbeit rych, är het, är het jo Liebi ou. No s’letschte Tou, Sägesse hou. Schritt für Schritt, Schnitt um Schnitt. No s’letschte Tou, Sägesse hou, Schnitt um Schnitt im Schritt.



Sunntig
(Hans Müller-Luchsinger)

Geisch i Waud am Sunntigmorge meinsch sigsch ime stüue Dom. Chlinder wärde dini Sorge, Lärm u Hascht wird do zum Hohn. Ufrächt steit e auti Fichte schier gar wie ne Wächter do, frogt di lys: Chasch mit dim Gwüsse ou so vor dim Schöpfer stoh.

Aui Lüt gö nid i d’Chile s’Fromm si lyt nid jedem Maa. Mänge wot us eignem Wüue mit em Herrgott Zwysproch ha. Sigs im Tau, uf höche Bärge, ou deheim bi eigne Lüt, überau fingsch Glück u Säge, s’sich haut eifach Sunntig hüt.

D’Chileglogge wot di lehre, los nur was si zu dir seit, söusch am Wärchtig o uno zehre, vo dr Liebi wo sie streut. Sigs im Büro, i dr Wärchstatt oder hingrem Pflueg aus Buur. Hesch dr Sunntig wohu verdienet für dis Wärche d’Wuche dür.

Letzte Änderung: 11. April, 2018