Mi Donschti Obe wurde im Dorfbach April 2022 veröffentlicht
Dr Donschti Obe isch ä Obe wie jede angere ou, mit eire chliine Usnahm. Am Donschti Obe duet dr Jodlerklub Mäuchnou, am viertuab achti, im Chilegmeinshus probe. I weis no guet wie mi erscht Donschti Obe, bi de Jodler isch gsi. Wöu das isch no gar nid so lang här. Wie das haut so geit, bi ou i überne guete Fründ zu de Jodler cho. Imne sehr ärnschthafte Gspräch, wo zitlech sicher scho chli meh gäge Morge isch gange, seit mir dr Tinu: «Jetz chunnsch eifach mou verbie, am Donschti Obe, viertuab achti is Chilegmeinshus». Was i när zur Antwort ha gä, weisi nümm so gnau. Uf jede Fau bini am nöchschte Donschti mit gange. I ha mehreri mou dütlech zur Sproch brocht, «dasi no nie im ne Choor ha gsunge» u «vom Noteläse hani de kei Ahnig». D Antwort isch ungefär so gsi: «Das lehrsch du de scho». Auso guet, hani dänkt. De goni am nöchste Donnschti Obe, am viertuab Achti ids Chilegmeinshus. Mir si vode erste gsi im Chilegmeinshus. Naa dis naa, si die Froue u Manne itroffe. Mi het enang d Hang gä, sali Heinzu, Rüedu, Kürtu, Denise, Steffu, Dänu, Willi, Remo, Mättu, Ueli, Pädu, Wäutu, Sabine, nei wie söui mir das merke, isch mir düre Chopf. «I weler Stimm wotsch du singe?» bini gfrogt worde. «Das weisi nid» u dasi nid cha Note läse hani ou nomou erwähnt. «Däm si Vatter singt im 2. Bass z Bützberg. De cha dä das ou». Nach der gnaue Eruierig vo mire Stimmlag, isches de pünklech am viertuab achti losgange. «Blaser Dänu, Hannes u dr Köbu si ou im 2. Bass. «Du muesch i dä Egge», hets gheisse. Nach däm i mi Platz ha gfunge, seit d Andrea üsi Dirigäntin: «So mir fö a, stöt uf». Nach es paar Ufwermüebige und em Isinge, hani ä ganze Ordner vou mit Notebletter übercho. I däm Momänt, bis aui s richtige Blettli zum singe hei devore gha, zeigi mis Noteblatt i mim Egge ume u froge: «Wo muesi luege?».Sicher i sim Ufträtte, meint dr Schäri: «zeig das Züg. Lue do, die Ungerschti Zile. Die Pünktli mit de Häus gäg abe, das si üser. Je witer obe das si zeichnet si, je höcher muesch singe». Nach dere lückelose Erklärig, hani suechend nachem richtige Ton u dr bedütig vo dene Hyroglüüfe ufem Noteblettli, mi erst Donschti Obe guet überstange. Gschlosse isch me när no ine Beiz. Wahrschindlech i d Linge, zum Musti übere. U wöu mr im 2. Teil vor Prob, probiere die grosse Rätsu for Mönschheit z löse u mr drüber diskutiere was nötig wär füre Wäutfride, ischs ke Usnahm, das äbe grad dä Teil ou mou chli lenger cha go. So oder ämu ähnlech, hani im 2019 no es paar Probe gha. Bis dr Momänt isch cho wos gheisse het, «Legit z Blettli furt u probieret usswändig z singe». Wöu das Stück z Wettlied isch gsi u mr das scho mängisch hei probet, isch das nid schlächt gange. Das het ou d Dirigäntin gmeint. « U jetze stöhter zäme u lueget u loset ufenang. Loset uf das wo dr singet u singets de ou so wies gschribe isch. När stöter mit Stoutz i dr Reihe». Nach dene Wort vor Andrea, hei mir üs büschelet. «Do vore rächts isch di Platz, vis a vis vom Chrigu» wider ä klari Asag. Woni ha afo singe, hani a die Wort vor Dirigäntin dänkt «..... stöht stoutz i de Reihe.» Zerst mou ghöri die klare schöne Frouestimme, wöu d Sändle grad näb üs steit. Die verschidnige Stimme, wo plötzlech richtig harmoniere u mer isch klar worde i be ou e Teil vo däm wunderschöne Momänt. Dr Toni wo immer ä schlaue Rotschlag parat het, chlopft mir nach dere wunderbare Erfahrig uf d Schoutere u meint: «äs isch haut de scho schön weme zämesteit». Jo das stimmt, das isch es. Leider isch was Uftritte ageit, im 2020 u 2021 nid vüeu glofe. Mir hei aber immer, wes ä chli isch gange probet. Ou es ungrads mou verusse ufem Babeler, womer scho vorem singe hei agfüüret, füre zwöit Teil vor Prob. Do muessi zue gä, hei mer scho vorem offizielle Probändi e Wurst u Brot ir Hang gha. Eistimmig heimer ou beschlosse, das ou ä Zertifikatsplicht üse Club nid cha spaute. Sit churzem ha i mi Donschti Obe widder zrügg. So richtig mit auem, wies mues si. Suechend nachem richtige Ton, dr bedütig vo dene Hyroglüüfe uf dene Noteblettli, sto i wider i de Reihe. Aui si a ihrem Platz, äs fäut kene. Äs isch grad äso, wies im 19ni bi mire erschte Prob isch gsi. U i weiss, aui Grosse Rätsu vor Mönschheit wärde mr nid chönne löse. Aber ä chliini Wäut, isch am Donschti Obe, viertuab achti im Chilegmeinshus, ä chli zfridniger u fridlecher. Öppis het sech auerdings gägeüber mim erschte Donschti Obe, für mi scho veränderet. Näbscht däm das i mittlerwile doch ou chli cha Note läse, ha i s ehrevoue Amt vom Presidänt vom Jodlerklub Mäuchnou, vo mim Vorgänger, am Phippu dörfe ubernäh. I hoffe, we du gärn mou ä Prob wetsch cho bsueche, das mini Gschicht dir dini Hemmige mou cho inezluege ä chli nimmt. U wär weiss, was dir so aus passiert. Mir stöh wider ide Reihe. Äs isch schön. U ä chlini Wäut isch wider zfridniger u fridlecher Wie schad wärs wes nüm äso wär. Äs Merci vo Härze mim Club, dass das gäng no so isch. U bis am Donschti Obe, viertuab achti im Chilegmeinshus
Eue Presi Summer Michu
Sommer Michael
praesident@jodlerklub-melchnau.ch